Zophei Semnak Siapanglai Tikhor Biahmaisa: Siapanglai tikhor cu laimi tuanbia ah siseh, zophei thawhkehnak tuanbia ah siseh, laimi pupa zumhnak le raithoining ah siseh hrial awk tha lo in a fiangmi tuanbia a kan chim khotu le a langhtertu a rak si. Mirang chan in ralkap ukhlan 1962 tiang cozah sianginn tangli lai carel ah rak cawn chihmi tuanbia a rak si. Lai tuanbia a rak ttial hmasa hna zong nih fiang tein a sining rak langhtermi le a tuanbia rak ttialmi tikhor a rak si ve.. Cu caah cattailtu zong nih ramrian le cattail hram a thawk ah semnak siapanglai le Leitak tuanbia ttial in a rak thok i, a tu zong ah cattialtu nih 1978 Laiholhreltu magazine ah rak ttial cangmi kha atu tthangthar mino hna zong nih fiang deuh in hngalh khawh nak ding caah fiang deuh in kaa hung inawlh tthannak a si. Siapanglai tikhor umnak le a min: Siapanglai tikhor cu Thantlang peng Leitak khuahlun sang ah a ummi tikhor a si. Leitak khua lai cer tlangpar ah tikhor huat in a rak putmi tlang tifim chuahnak tikhor a si, Tikhor cu pe li nga tluk a thuk, pe ruk hrong a kau, lung ngan pipi in kulh a si, a cung in lungpher nganpi pakhat khuh a si. Tikhor in pe kul velchum cu lung kahcham in rak kulh a si. Siapanglai tiah min an rak peknak chan cu hi tikhor kam te ah hin sia a rak thihnak hmun a si caah siapanglai an rak tinak a si. Siapalang tikhor huattu hna: Siapanglai tikhor a huattu hi minfang kheh in a nih tikhor, amah nih a huat, anmah chung huatmi ti ngaingai fiang in kan tuanbia ah a lang lo. Leitak pupa hna robia ah cun mikei nih rak huatmi le sermi a si ti a rak si. Cu mikei zong cu khuazei in dah an rat ti zong fiang ngai in chim khawhmi a um lo. A tu kanmah kan upat hnu tu ah 1984 ah Siangpanglai Mino Lungkomhnak Bu (SMLB) min in Leitak tuanbia hlathlaitu komiti kan rak ser, Cu komoti hlatnak ah cun Rev.Ci Lian le Pu Sang Khar nih an rak kan chimhmi cu Hakha, Mie peng Keipaw khuami Pu Phu Sui (mi sa ei hmang phun) ruahnak cheuhnak in a hmasa Leitak khua an rak tlak ah an rak huatmi le sermi tikhor a si tiah mi e peng pupa hna nih an fa le sin ah robia an chiahtakmi hna an theihmi an rak kan chimh chin ve. Kan lai tuanphung tialtu Lutthuh U Hla nih Chin pungpin chung in Mikei le Nivang tuanbia a ttialmi he aa lo ngai nain cu tu ah cun siapanglai tikhor huatnak he aa tlaihnak a lang ve hoi lo. Shmanhsehlaw a tu kanmah chan ah ruadamh in kan pawm cang mi cu siapanglai tikhor cu mi sa ei hmang (mikei) sermi a si tiah Leitak pupa robia ah a um bantuk in mi e peng tuanbia zong ah siapanglai tikhor huatnak tuanbia he a tlai in Nivang le Phusui tuanphung an ngeih tik ah hihi a neih bik ko rua tiah SMLB nih a rak cohlan ve. Cu caah siapanglai tikhor huattu hna cu a tu Leitak velchum ah khua a rak tla hmasa mi hna Leitak phun, tlanglau le Bawm chung hna an si kho tiah zumh a si. Siapanglai tikhor huat kum le a voikhatnak Leitak tionak: Cattial in tuanbia khumh mi a si lo caah a voikhatnak Leitak an tlak hi a ho nih a rak hruai hna ti fiang in chim khawh a rak si lo, sihmanhsehlaw khua min ah Leitak ti a si tik ah Leitak phun hruainak in Leitlak khua cu tlak dawh in zumh a si. Chin tuanbia ttialtu hna nih an langhter ning ah hin Kalay kabaw in tlangpar kan kai hi AD 1400 hrong a si lai tihi mitam deuh zumhnak a si. Chin tuanbia kan zawt ah hin kanmah in kan tuanbia ttialmi a rak um lo caah cattail in chantampi a kal cangmi hna Kawl le Shan tuanbia hi kaltak awk kan rak ttha tawn lo. A voikhatnak Kawl pennak (pagan chan) ah Chin le kawl cu hmunkhat ah kan tlawng tti ti cu ttuanbia ttialtu dihlak nih cohlan a si. Pagan pennak cu AD 1300 lai te ah a rawk i Shan pennak tang luh a si tik ah Chin miphun cu Irrawaty va hron ah um duh ti lo in Pantuang tlangpar lawnh in nitlak lei, Chintwin a lu lei kalay kabaw velchum ah ram an rak ser. Micheu cu kawlram nitlak-thlanglei hoih in a kal zong rak um ve dawh an si. Cu an umnak kalay kabaw ahcun holh le nun phungphu tete in khua rak sak cio a si. Kum zakhat hnu AD 1400 lai te ah Shan nih an rak pen tthan hawi hna. Chin miphun cu dai tein um a duh phun an rak si ruang ah AD 1400 lai lila ah zalong tein um ruah ah an phu tete cun tlangpar ah rak kai cio a rak si ti a si. Tuanbia hlat hna langhterning ah cun tlangpar a rak kai hmaisa hna hi Masho, le khumi phun an si ti a si. Cucu a tu hi nitlak thlanglei ah an ttum tthan i Zakhiang ram, Zaw tlangthluan le a kiangkap Magew ramthen le Paletwah thlanglei deuh ahkhin an um ti a si. A phu hnihnak hi Bawm, tlanglau, leitak le Mara an si ti a si caah Siapanglai tikhor huattu hi hiphu hi rak si hna sehlaw a dawh bik. A tu ah cun Bangaladesh Bawmram le Mizo ram chung ah khua an sa hna. An kai caan tuak tik ah AD 1400 pawngkam hrong in zumh a si caah Siapanglai tikhor an huat zong hi AD 1400 hronghrang sidawh bik a rak si. A phuthumnak le a donghnak ah tlangpar a rak kaimi hna cu lai, lushei le� zo (tiddim lei) phu an si ti a si. Siangpanglai tikhor umnak cu zei ti hnah hmanh a um lonak tlangpar fing ah a si, Pu Phu Sui nih tikhor huatning le ti kawlning ruahnak a rak cheuhmi hna hi a si kho ngaimi thil a rak si, tlanghrawn a kuat deuhnak zon ah lapar tom nan chiah lai, laibel (Lentebel) in cu lapar tom cu nan khuh lai, thaizing zingka ah zohthan uhlaw a cin dih ahcun cuhmun ahcun ti a um tinak a si, tungpil in vulei cawhpiak uhlaw tlang tiput a um lai, tiah ruahnak a cheuh hna ti a rak si. Pu Phu Sui cu mi sa ei hmang a si ruang ah Leitak nih cun an rak thah ti a si. Keipaw khuami cu an lung a fak ve i Leitak khua cu an rak chim caah a voi khatnak tlakmi Leitak khua cu caan tawi te chung ah mikei ruang ah a rak tio ti a si.. Tuanbia dang ahcun vui ttheo ruang ah an tio a ti zong an um ve. A tu Zophei ram a tla hmasa cu Thangngan a si: A voikhatnak Leitak tio lio Leitak ah khua a rak sa hmasa hna cu Mizoram, Chimtuipui le Bawmram hna ah an va itthek. Caan zei mawzat an um hnu ah Mizoram, Chimtuipui an umnak Salua khua cu ti nih an khuaning piin a rak khuh caah an khua a rak tio timi tuanphung an rak ngei ve. Ngaitainu tuangphung le Liandodar tuanphung he aa lo ngai rih. Khua tio ruang ah hmunthar an rak kawl cio, mitam deuh cu nicheuh chakhlei bawinu va hron in rak kai a si, cu lak ah Thangngan le Hlawnri (Lianchin a ti an um) cu bawinu va hnah lei an rak lan i, thanghor va hram an phak ah Sadipui hmun a tu Tisen khua khi khua hmun ah an rak ihalh tti ti a si. A ho dah khuahmun ham hmasa ti kha hmelchunh arbawm an tarmi in an zot tik ah thangngan arbawm a hlun deuh. Sihmanhsehlaw thangngan cu mino deuh a si caah Lianchin kha a rak kianh i a tu tiang an um lan, amah Thangngan cu thanghor va hnah lei a rak kai tthan, a tu Leitak ramchung siapalai ah um hmun an rak khuar hmasa, Cu ri cun zophei pengkulh khua sak thai a si caah a voi hnihnak le a tu zophei ram a kan tlakpitu hna cu Thangngan chung an rak si. Siapanglai tikhor a ngeitu cu Suihleng an si: Leitak ramchung hmun thum li ah khua an rak sa. Cu lio ah an zuat satil poah kha cakei nih a rak pamh piak tawn hna. Voikhat cu Suihleng pa sia a pamh, lungfah in a rak doi i atu siapanglai tikhor hram ah khin langkatum (ngun kuthrolh) in cakei cu a rak thah. Cu pawng te ah cun lung nganpipi in aa kulhmi tlangtifim chuahnak tikhor ttha ngai a rak hmuh. Tikor ttha le khuatlak awk ah a rem� ngaimi hmun ka hmuh, hi khua ah hin khuasa tti hna uh sih tiah a kiangkap ummi hna kha a rak sawm hna. Zophei ram tla hmasa thangngan chung cu atu Leitak le Zabung kar ah khin an rak um. �Suihleng pa nih, nan nih thangngan chung cu ramtla le laamhruai nan si caah Leitak khua ah nan duhmi inn hmun ithm uh, nanmah nih nan kan hruai lai, keimah nih hi tikhor cu ka sia cakei nih a pamhnak a si caah Siapanglai tikhor tiah kaa sak ve, keimah tikhor a si lai, tiah a rak ti hna. Cu cangka Bawitlai pa nih thal a kah zau i ka kahnak hmun poah ka ram a ti, Aihling pa zong nih Leitak khua luh lai tiva hor khi ka tiva a ti cawlh ve ti a si, nihin tiang auh lan an si hna. Hmun thum li khuasa an rak isawm dih, Hluike, tlumang, Zawtlui le a dangdang hna zong an rak itel ve. Cu thawk cun atu tiang Leitak khua hlun sang um siapanglai tikhor toh in khua an rak sak kha a si. Siapanglai tikhor do danghnak le a voi hnihnak Leitak tlak kum: Siapanglai a ngeitu cu Suihleng chung an si bantuk in kum tin vok rial in rak dangh peng a si. Leitak ramukbawi Hlawnceu hna nih Chankhat ah voikhat siapi in an rak dangh ton ve. Leitak nih Hlawnceu ramuk ah an rak ilak hna hi Thangngan chung chan in chan li nga an um hnu ah a rak si. Hlawnceu kan pa le hna chan relning ah Pu Sai Thang in Pu Mang Ling in Salai Mang Hnin Mang tiang ah chan 15 a si. Thangngan chung chan ah Thangngan roco Pu Lal Tum fapa Pu That Vung in Salai Mang Hei Lian tiang ah chan 20 kan si ve cang ti a si. Cu caah a voi hnihnak Leitak an tlak cu AD 1500 hrong (20x25=500) ah si dawh bik a si. Cu ve bang in Leitak hlawnceu phun an phak hi AD 1625 hnu (15x25=375) ah si dawh a rak si. A ruang cu vulei cung tuanbia hlat hna nih chankhat cu buaktlak in kum 25 ah rel cio a si caah hi hrong hi si dawh bik a si tiah zumh a si. Siapanglai a sunlawi khunnak cu sualthianhternak tikhor a rak si kha a si: Kan pupa chan ah cun mit ah mit ve, ha ah ha ve, hnar ah hnar ve tiah leh rulh icham chan a rak si caah ngeihthiam timi biafang hmanh an rak ngei lo. Pakhat khat nih lai a nawn sual ahcun a nunnak lak tthan in phuhlam a rak si ko. Ihlam khawh lo ah hin rak inautat a rak si rih. Sihmanhdehlaw khuarauh har ngai a simi cu lainawng nih siapanglai tikhor ah a kut a hnim i siapanglai tikhor ti in a kut aa ttawl ahcun a sual a thiang tiah an rak zumh, cu hnu cun lehrulh cham thah tthannak in rak luat a si. Cu caah lai nawng poah nih nunpeh an duh caah siapanglai tikhor cu purh in kut ttawl zuam cio a rak si. Khuaruah har chin a simi cu lainawng nih a kut aa rak ittawl khawh ahcun tikhor dihlak thisen ah ai cang, cu thisen cu siapi in thianh lo ahcun din ei awk a rak ttha lo tiah an rak zumh. Kan Laitlai chung in lainawng an um ti thawng pang a len cang ka Leitak khuami nih tikhor cu zan khua dei rak cawngh a si ton. Sual thianh ruah ah tikhor a rak purtu kha an tlaih khawh ahcun tikhor thianhnak ah siapi an rak liam ter hna i cu in cun rak thianh a si ton. Liam awk a ngeih lo ahcun ramuk bawi nih ttuanvo a lak i a rak purtu kha innchung sal ah an rak tlaih ton hna. Cu cu siapanglai tikhor a sunlawi khunnak a rak si.. Hi laitlai kan zulhphung robia sung kan rak ngeih mi cu mirang an rak kai ah Leitak a rak phan balmi Major Mabnett (Laica a kan ser piaktu hmasa) nih sualthianh ternak siapanglai tikhor kong cu cattail in a rak khumh i cucu Chin Hills Vol 1 ah hmuh khawh a si. Siapanglai tikhor ah kut aa rak ittawlmi Pu Thang Cem le zophei thawhkhenhnak tuanbia pehtlainak: Pu Thang Cem (Thangmacem) cu zotung peng Vauti khua mi a rak si, ram an riah ah meithal in a nupi pa (A pu) a rak kah sual, nun peh ruah ah siapanglai tikhor purh cu aa rak izuam ve. Leitak nih Vauti ah lai an inawng ti thawngpang an rak theih cia ve caah siapanglai tikhor cu chun zan in an rak cawngh ve ti a si. Zanttim ah tikhor cu a rak fuh ve taktak, a kut aa ttawl hnu ah Leitak khuami nih Thang Cem cu an rak tlaih, siapanglai tikhor thianhnak ah siapi in na khuami nih rak in tlanh hna seh, tiah an rak ti. A pu hliam sual a si tik ah an rak tlanh duh ti lo, Leitak ramuk bawi in ah a rak tang ko ti a si. Pu Thang Cem cu amah in Vuati khua ah sia tampi a rak ngei ciami a si caah ramuk bawi nawl peknak in Vauti ah a sia cu a va kanh dih hna hnu ah amah tein a rak itlanh tthan i ramuk inn cun a chuak..Siapanglai tikhor ah a kut aa ttawl cang ruang ah Vauti khuami zong nih thah tthan khawh a rak si lo. That tthan sual hna sehlaw Chia ah rak ruah a si. Ramuk inn in a chuah hnu ah Leitak ah thangngan chung nu a rak tthit tthan ti a si. A sia cu thanghor va ral tlanglet lei ah a va khalh tawn hna, ni hin tiang in thangmaceng siakhalhnak tlangbo ti a si lan. Leitak in a hmasa bik tlakmi Leisen khua le tlak kum: Pu Thang Cem cu Leitak ah caan zeimawzat a um hnu ah a nupi tta Pu Thla Lian le a dang chungkhar pa kua hra sawm in sia khalhnak a neih deuhnak lei Leisen khua cu an va tlak. Leisen an tlak hi Leitak ramuk chan ruknak Pu Bawi Khar chan ah a rak si, AD 1750 hnu si dawh a si. Cu Leisen khua pawng ah hin Hoitheng phun (Mara) nih rak tlakmi Cirang khua a rak um cia ve cang. Leisen khua cu hoitheng le thangaw nih an rak chim lengmang hna ti a rak si. Leisen khua ah Pi Mang Hluan le Ni Vung an zaam: �� Pu Bawi Khar fapa cu Mang Hnin 1nk a si. Hakha sangte chung Lian Nawn unau, Pu Lian Pawng fanu Mang Hluan a tthit. Fapa fangkhat Tial Khar te long an ngeih manh, chan tlung loin Pu Mang Hnin nih a roh hna. Mang Hluan a tthit hlan ah nuchun in Pu Mang Hnin cu fapa Ni Vung a rak hrin cang. Pupa chan ahcun inn tual thio ah rak ivui hna kaw, Pi Mang Hluan nih mangchia manh in inntual ah Mang Hnin thlan hram ah cun zuun ngaih in a rak tap ton ti a si. Cu ah cun Ni Vung zong cu a tlangval ve cang i a nu te Pu Mang Hluan cu a va hnemh ve ton rua. Cu ti cun inn khat ah caan sau an tlawn len tti tik ah duhsah tein Tial Khar zong cu a hung za i mi nih na nu le na u an iduh tiah Tial Khar kha an rak sawh lengmang cah mi hmai a khap ve ti lo i zudinnak an tthut tti ah siseh, an ichawhtti a hmuh ah siseh lai chai in a rak chaih lengmang hna. Cu caah caan sau um ngam ti loin an itthium beh lawlaw i Leitak khuasak ngam ti loin Leisen lei ah an rak zaam ti a si. Leisen ah hin anmah hlawnceu chung Ni Vung a pate Hmung Tling hi a rak um ve cang ti a si. Cu lio ah cun Tial Khar putar Pu Bawi Khar a nun rih caah Tial Khar cu a putar sin ah �a rak um ti a si. Pi Mang Hluan hruaiak in Al Bik le Hlei Lian cu Leisen khua in a lakpi hna: Pi Mang Hluan le Pu Ni Vung an phak ah hin hoitheng le thangaw nih Leisen khua cu an rak chim peng rih hna. Cu lio ah cun Hakha sangte bawi Pu Lian Nawn cu mara peng tlawn ah Leisen a rak phan. Pi Mang Hluan nih Pu Lian Nawn cu hoitheng le thangaw ral ruang ah khua kan sa kho ti lo, nafa le pakhat tal nih kan umpi hna seh tiah a rak hal. Pu Lian Nawn nih a timi cu keimah fa le cu an um lo. Ka u Thang Ding (sangpi chung) nih Lungzarh vankhing nu sin ah a hrin mi hna fapa 2, Al Bik le Hlei Lian an um, ka u chim deuh, a rak ti ti a si. Pi Mang Hluan cu Leisen khuami nih an rak zulh, Hakha Pu Thang Ding sin ah Al Bik le Hlei Lian cu an rak hal. Lunglawm tein a rak pek hna caah Al Bik le Hlei Lian cu an nu he Leisen khua ah cun Pi Mang Hluan le Leisen khuami nih an rak tlunpi hna. Anmah phak hnu zong ah an zat rih lo caah hoitheng le thangaw nih cun an rak chim peng rih hna. Pu Bawi Khar nih hoitheng a rak ti tonmi hna cu, zathang fa cu an za lai i nan celh hna lai lo dah kaw, nehsawh ti hna hlah uh,dawt ihlawh uh! a rak ti nain an ngai hlei lo ti a si. Leisen in Khuacareh ah an itthial: A hnu ah cun an celh ve ti lo i anmah phak khawh lonak Khuacereh hmun ah an rak itthial. �Pu Bawi Khar bia bang AL Bik le Hlei Lian an hung zat cangka hoitheng kha an tlaih ve cawl hna, an chim hna, hreng an khenh hna. An icelh ve ti lo caah Pu Bawi Khar cu nang tlang kan tlak ko kun tiah an rak nawl. Pu Bawi Khar (an ttang) nih Al Bik le Hlei Lian a rak timi hna cu, hoitheng mi nih leisen khuami hreng an rak khenh tonnak hna tia in rawlruk sa hna seh, inn laam hra chung ah inn chung inn leng in rawlruk cu an tlar lai, cu chung ah cun facang, fatun, phiang le lairawl phuntling khat tein in rawn piak hna sehlaw cu hnu cun hreng nan khenhmi hna zong thlah piak ve hna uh, hmailei zong ah idaw thai cang uh, a rak ti hna, an phu hnih in an lung a rak tling, cucu Al Bik le Hlei Lian lianhhram an thawknak a rak si ti a si. Khuang zong voi hnih tiang an rak cawi ti a si. Khuacareh in Vuangtu khua ah: Khuacareh cu sa le ral ttih deuh ah rak tlakmi khua a si caah tthial hi an rak duh ngai. Cu hronghrang ah cun ram an vaihnak ah a tu Vuangtu khua hram la aw va kiangkap an va phan, nga a tam, loram a ttha, khuacaan an duh zawng te a si caah Al Bik hruainak in cu ka hmun ah cun an va itthial. Cu ah cun Pu Thang Cem nih nan lak ah upa bik ka si. Leitak in Leisen, Leisen in Khuacareh in a tu tiang kan zulh peng fon hna caah keimah le ka thawhkehnak philh lo nak ah khua min cu Vauti ka sak piak sawh ko uh a rak ti hna caah Vuangtu ti a si lan. Cu lak ah micheu cu Vuangtu kal duh ve loin hoithang nih an tio takmi ram toh in Cirang pawng Khuabung ah an va itthial ve ti a si. Vuangtu in Hriphi ah: Vuangtu an tlak tlawm pal ah Al Bik nau Hlei Lian cu ram a rak vai ton ti a si. Ram a vaihnak ah made khua a va hmuh. Khuathartlak a sawm hna i an lung a tlin ve caah Vuangtu in inn li nga he a tu Hriphi khua hlun ah khua a rak tlakpi hna ti a si. Cirang khua (mara-hoitheng phun tlakmi khua) tionak le khuabung khua tlaknak: Hoitheng phun umnak Cirang khua cu Zokhua nih kawl an rak iroih hna i an rak chim caah a rak tio. Zokhua nih an rak chimnak hna a ruang cu nihlawh sawmpal hal ah mara peng a rak tlawngmi Zokhua mi pa hnih lak ah Pu Bawi Lung, khengmual chung pa cu Cirang khua pa he chuncaw funnak hnah ttawh le ttawh lo kong an bia an ithei sual i Cirang khua, hoitheng pa nih nam in a hnawng a rak pheh.Pu Bawi Lung hawi nih khuami a chimh ve hna tik ah khengmual chung nih Cirang khua ah cun phu hlam an rak itim ti a si. An vung itimh luklak kar ah a naupa cu lungfah tuk in mah lawng in a rak kal, hoitheng nih an rak thah chap ti a si. Cu caah Zokhua nih anmah long an ngamh ti ve lo i kawl an rak iroih hna nak kha a rak si, tampi an rak thah hna caah an khua zong a rak tio thai. Cu hnu cun Cirang khua le a kiangkap cu hmun lawng ah a cang. Vuangtu lei kal a duh lomi nih Khuacereh in Cirang khua lei ah cun an rak itthial ve. Cu hmun cu khuabung tupi hram a si caah khua min zong Khuabung an ti lannak khi a si ti a si. Khuabung an va itthial ahhin Pu Ni Vung le Pi Mang Hluan zong Vuangtu lei lanh ti lo in Khuabung ah cun an rak tang ve ti a si. Leitak khuachung ummi zong an rak sawm chih hna caah Khuangbung an phak ahhin milurel zong an rak tthahnem ngai ti a rak si. Caan tlawmpal a ruah ah Vuangtu bawi Al Bik fapa Pu Hniar Kham an rak ilak. A donghnak siapanglai tikhor ah kut aa ttawlmi le bia donghnak: Siapanglai tikhor ah Khrifa si hlan a donghnak kut aa rak ittawlmi cu mirang kai hnu Pu Mang Hnin 2nk chan ah Congthai khua mi (a min ka philh) a si ti a si. Khuami nih a kut aa ttawl lio ah an tlaih khawh caah siapi can ai ah Re. 25.00 an rak liam ter. Cu hnu cun Khrifa phung kan luh cang caah siapanglai ah kut ittawl can ah sualngeihchihnak hmel chunh ah Pa le Fapa le Thiangthlarau min in tipil pek ah kan thlen cang i kut long si ti lo in kan pumpaluk in ihnim a si cang. Cu caah zophei peng ah khua a rak hmunh thainak hi siapanglai tikhor ruang ah a rak si, cu siapanglai cun kan karh chin hnu ah khua le ram ser cio a rak si. A cunglei ah kan langhter bantuk in zophei peng kan karhning cu,
Mi le mauhram an ti bang zophei peng khuasa dihlak hi hrih le hram he thawhkehnak he aa rak itlai dihmi long te kan si. Pupa chimkem ah siapanglai cu �Tui thuonak mai zangnak (tiput hram a thawknak le mei kanghhram a thawknak) ti a rak si. Cu caah Siapanglai tikhor cu laimi tuanbia ah siseh, zophei thawhkehnak tuanbia ah siseh, laimi pupa zumhnak le raithoining ah siseh hrial awk ttha lo in a fiangmi tuanbia a kan chim khotu le a langhtertu a rak si hi zophei kan ivantthat khunnak le Pathian thluachuah a rak sinak a si. Aa daw hria peng ding, aa zohkhenh peng ding le a ttang tti peng ding kan si hrimhrim ti kha siapanglai tuanbia nih fiang tein a langhter. Cu cu a tu mino dihlak nih fian dih le theih cio a ttha tiah ka ruah caah ka rak ttialcia kha sau deuh le fiang deuh in kaa hung inawlh tthan hi a si. Ceu Mang Note: Mah ca hi Salai Ceu Mang nih 1978? ah ka rak ttial ciami a si i Pu Johan nih a ka hal ca ah tlawmpal ka remh (modify) hnu ah kan kuat tthanmi hna a si tiah SIB Group mail ah 14 MAY 2004 ah a thlah mi a si. ------------------------------ "Serve with gladness" |
Kan Thilrit I Chawng Usih
2 years ago
No comments:
Post a Comment